No Insurance No Fuel: ఇన్సూరెన్స్ లేకుంటే పెట్రోల్, డీజిల్ బంద్? సుప్రీంకోర్టు కీలక ప్రతిపాదన!

వాహనదారులకు కీలకమైన వార్త. ఇన్సూరెన్స్ లేకుండా రోడ్లపై తిరిగే వాహనాల విషయంలో సుప్రీంకోర్టు తీవ్ర ఆందోళన వ్యక్తం చేసింది. ఇన్సూరెన్స్ లేని వాహనాలకు పెట్రోల్, డీజిల్ అందకుండా చేసే విధానాన్ని తీసుకొచ్చే అంశాన్ని కేంద్ర ప్రభుత్వం పరిశీలించాలని సూచించింది. ఇందులో భాగంగా ‘No Insurance.. No Fuel’ విధానాన్ని పైలట్ ప్రాజెక్ట్‌గా అమలు చేసే అవకాశాన్ని పరిశీలించాలని పేర్కొంది.

జస్టిస్ సంజయ్ కరోల్, జస్టిస్ ప్రశాంత్ కుమార్ మిశ్రాలతో కూడిన ధర్మాసనం ఈ అంశంపై విచారణ సందర్భంగా కీలక వ్యాఖ్యలు చేసింది. దేశంలో భారీ సంఖ్యలో వాహనాలు సరైన థర్డ్ పార్టీ ఇన్సూరెన్స్ లేకుండానే రోడ్లపై తిరుగుతున్నాయని కోర్టు పేర్కొంది. ఇలాంటి పరిస్థితి మోటార్ వాహనాల చట్ట నిబంధనలకు విరుద్ధమని, రోడ్డు భద్రత పరంగా ఆందోళనకరమని తెలిపింది.

ఇన్సూరెన్స్ లేకుంటే ఫ్యూయల్ రాదా?

సుప్రీంకోర్టు సూచించిన ప్రతిపాదన అమల్లోకి వస్తే, వాహనం పెట్రోల్ బంక్‌కు వచ్చినప్పుడు దాని ఇన్సూరెన్స్ స్టేటస్‌ను చెక్ చేసే వ్యవస్థ ఉండే అవకాశం ఉంది. థర్డ్ పార్టీ ఇన్సూరెన్స్ లేకపోతే పెట్రోల్ లేదా డీజిల్ ఇవ్వకుండా చేసే విధానాన్ని ప్రయోగాత్మకంగా అమలు చేయవచ్చని కోర్టు సూచించింది.

అయితే ప్రస్తుతం దేశవ్యాప్తంగా ‘No Insurance No Fuel’ నిబంధన అమల్లోకి రాలేదు. ఇది ముందుగా కొన్ని ప్రాంతాల్లో పైలట్ ప్రాజెక్ట్‌గా పరీక్షించే ప్రతిపాదన మాత్రమే.

మొదట ఎక్కడ ప్రయోగించవచ్చు?

ఈ విధానాన్ని తొలుత జాతీయ రహదారులు, ప్రమాదాలు ఎక్కువగా జరిగే ప్రాంతాలు, టోల్ ప్లాజాల వద్ద ప్రయోగాత్మకంగా అమలు చేసే అంశాన్ని పరిశీలించాలని సుప్రీంకోర్టు సూచించింది.

ఈ పైలట్ ప్రాజెక్ట్‌ను ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా (IRDAI), రోడ్డు రవాణా మరియు జాతీయ రహదారుల మంత్రిత్వ శాఖ సమన్వయంతో చేపట్టే అంశాన్ని పరిశీలించాలని పేర్కొంది.

టెక్నాలజీతో ఇన్సూరెన్స్ చెక్

వాహనాల ఇన్సూరెన్స్ వివరాలను త్వరగా గుర్తించేందుకు Automatic Number Plate Recognition (ANPR) కెమెరాలను వాహన, ఇన్సూరెన్స్ డేటాబేస్‌లతో అనుసంధానించే అవకాశాన్ని కూడా పరిశీలించవచ్చు.

అలాగే ట్రాఫిక్ పోలీసులకు మొబైల్ టూల్స్ అందించడం ద్వారా వాహనం ఆపిన వెంటనే దాని ఇన్సూరెన్స్ వివరాలను చెక్ చేసే విధానం తీసుకురావచ్చని సూచించింది.

వాహనదారులకు ఉపయోగం ఏంటి?

ఈ విధానం వల్ల ప్రధానంగా రెండు ప్రయోజనాలు ఉంటాయని కోర్టు అభిప్రాయపడింది.

1. ఇన్సూరెన్స్ లేని వాహనాలను సులభంగా గుర్తించి చర్యలు తీసుకోవచ్చు.
2. తమ వాహన ఇన్సూరెన్స్ గడువు ముగిసిందనే విషయాన్ని యజమానులకు సకాలంలో గుర్తు చేయవచ్చు.

కొత్తగా కొనుగోలు చేసే వాహనాలకు తప్పనిసరి థర్డ్ పార్టీ ఇన్సూరెన్స్ వ్యవధిని పెంచడం సహా మరిన్ని రోడ్డు భద్రతా చర్యలను కూడా పరిశీలించే అవకాశం ఉంది.

వాహనదారులు గమనించాల్సిన విషయం: సుప్రీంకోర్టు సూచనల ప్రకారం ‘No Insurance No Fuel’ విధానం ప్రస్తుతం దేశవ్యాప్తంగా అమల్లోకి రాలేదు. పైలట్ ప్రాజెక్ట్, తదుపరి నిర్ణయాల ఆధారంగా భవిష్యత్తులో దీనిపై మార్పులు రావచ్చు.